Qashqadaryoda kadastr xodimlarining tushuntirishlari natijasida yer maydonlari noqonuniy egallab olingan mingdan ziyod holat fuqarolar tomonidan ixtiyoriy bartaraf etildi.

Qashqadaryo viloyatida 2022 yilda yer uchastkalarini o‘zboshimchalik bilan egallab olish va ushbu yer uchastkalarida noqonuniy imorat qurilishiga oid 1 ming 934 ta holatda 1 ming 720,7 gektar yer maydonida qonun buzarlik holatlari aniqlangan.

Bu haqida Kadastr agentligining Qashqadaryo viloyati boshqarmasi boshlig‘i Jasur Usmonov ma’lumot berdi. Boshqarma boshlig‘ining ma’lum qilishicha, Kadastr agentligi Qashqadaryo viloyati boshqarmasining tuman-shahar bo‘limlari tomonidan yer qonun buzilish holatlarini bartaraf etish bo‘yicha o‘tkazilgan profilaktik tadbirlar natijasida yer qonun buzilish holatlarining 1 ming 25 tasi ya’ni 1 ming 484,5 gektari joyning o‘zida bartaraf etilgan.

– Fuqarolik ishlari bo‘yicha sudlarga o‘zboshimchalik bilan egallangan yer maydonlarida noqonuniy qurilgan imoratlarni bartaraf etish to‘g‘risida 909 ta (236,2 gektar) da’vo arizalari kiritilib, shundan 541 tasi qanoatlantirilgan. 357 ta da’vo arizalari hozirgi kunda ko‘rib chiqish jarayonida, – deydi Jasur Usmonov.

Hududlar kesimida tahlil qilinganda yerga oid qonun buzilish holatlari Yakkabog‘ tumanida ko‘p aniqlagan. Bu 217 ta holatda 30,1 gektarni tashkil etadi. Qo‘shimcha qilinishicha, qonun buzarlik holatlari Qamashi tumanida 185 ta holatda 88,1 gektar, Qarshi tumanida 181 ta holatda 26,1 gektar, Koson tumanida 153 ta holatda 1 ming 174 gektar va Kasbi tumanida 155 ta holatda 120,8 gektarni tashkil qilgan.